El Muséu

Nun llugar privilexáu de la costa del Principáu, a 155 metros sobre'l nivel del mar, álzase'l Muséu del Xurásicu d'Asturies (MUJA), un muséu singular que, baxo la forma d'una gran buelga tridáctila de dinosauriu, acueye una de les muestres más completes y didáctiques del mundu sobre estos fascinantes reptiles.

Col “tiempu” como filo conductor, nel MUJA amuésase la evolución de la vida na Tierra dende los sos entamos hasta la llegada del home, faciendo especial fincapié nel Mesozoicu o Era de los Dinosaurios y nos sos trés períodos: Triásicu, Xurásicu y Cretácicu, a los que fai referencia cada unu de los trés deos de la gran buelga que forma l'edificiu.

Nel MUJA, tan espectacular ye'l continente como'l conteníu: l'arquitectu Rufino Uribelarrea escoyó pal esterior un sistema de llámines de formigón prefabricáu que dexa la fachada ciega, sacante les puertes d'entrada y salida. La cubierta ye de cobre vieyu, y col tiempu va dir tomando un tonu verde y integrándose dafechu nel paisaxe.

Nel interior, una estructura de madera procedente de viesques escandinaves forma un entramáu d'arcos de mediu puntu qu'asomeyen les costielles de los dinosaurios y ufierten al visitante la sensación casi máxica d'un viaxe nel tiempu.

Arriendes d'ello, la redolada del edificiu multiplica les posibilidaes de disfrute. Vistes privilexaes sobre la costa asturiana, zona de xuegos infantiles, xardinos que permiten paseos ente répliques de dinosaurios y el Café del MUJA faen de la visita al Muséu una esperiencia única.

Comparte:       pdf Imprimir Enviar