Los más de 7.000 metros cuadraos del Xardín del MUXA permiten al visitante realizar un percorríu pela Era Mesozoica o Era de los Dinosaurios, afayando les répliques de los dinosaurios más conocíos, con información detallada de los mesmos, y diverses pieces orixinales del Xurásicu Asturianu. Pa la primer fase del proyectu de reestructuración del esterior del Muséu del Xurásicu d′Asturies cuntóse con una aportación económica de la Fundación Española pa la Ciencia y la Tecnoloxía - Ministeriu d′Economía, Industria y Competitividá.

Nel Xardín pueden observase reproducciones de dinosaurios del Triásicu, con un Liliensternus y una escena con un Eoraptor y un Buriolestes compitiendo por un llagartu pequeñu.

El públicu tamién pue ver nel esterior dalgunos de los xéneros más representativos del Xurásicu –Diplodocus, Allosaurus, Dacentrurus y Camptosaurus– coles répliques de cuatro dinosaurios, ellaboraes a costafecha pal MUXA por Adolfo Cuétara. A esto suman el Estegosaurus y el Brachiosaurus, con dos críes d′esta especie de dinosauriu xurásicu.

Otres 15 répliques de grandes reptiles pertenecientes al Cretácicu acompañen al visitante nel so viaxe pola Era de los Dinosaurios nesta zona museística al campu. Dos llamativos Tyrannosaurus, un Euoplocephalus y una escena de Triceratops cola so cría y un nial de güevos ensin eclosionar y críes que yá salieron de la cáscara, complétense con una escena dedicada a los dinosaurios carnívoros del Cretácicu, con una pareya de Deinonychus y un Carnotaurus, y otra escena de dinosaurios vexetarianos d′esti periodu, con un Pachycephalosaurio y una pareya de Parasaurolophus.

Les reproducciones del craniu cadarma d′un Triceratops, un pterosauriu, la pata d′un Tyrannosaurus y dellos güevos de dinosaurios que permiten facese una semeya divertía son dalgunos de los atractivos que se sumaron al Xardín.

Na zona esterior eshíbese amás material orixinal del Xurásicu Asturianu, como una buelga d′un dinosauriu terópodo, el tueru fosilizáu d′una conífera o′l rastru formáu por dos buelgues consecutives d′un terópodu, presentándose como un complementu esencial na visita a la esposición permanente del Muséu.

Retruques de xacimientos y zona de xuegos pal públicu infantil

El Xardín tamién cunta con répliques parciales de los xacimientos de icnitas de los cantiles de Tereñes, en Ribesella/Ribeseya, y de la sablera de La Griega, en Colunga. Estes reproducciones permiten amosar al visitante les buelgues producíes por cuatro dinosaurio xurásicos que les sos répliques pueden vese nel esterior del Muséu (tireóforos, saurópodos, terópodos y ornitópodos). Delles meses d′interpretación, en castellán y braille, completen la información sobre estos xacimientos a los que s′apuerta cómodamente gracies a una pasarela de madera.

Amás, el MUXA cunta un caxón d′escavación asitiáu al llau de los yacimientos con buelgues que contien distintes répliques de fósiles de dinosauriu (dientes, garres, güesos…) pa que′l públicu infantil pueda conocer parte del trabayu paleontolóxicu.

Los más pequeños tienen amás otru aliciente na redolada del MUXA: un parque infantil con columpios, toboganes y xuegos personalizaos, colos dinosaurios como protagonistes.

Les árees esteriores tán uníes per un senderu hormigonáu que permita l′accesu a persones usuaries de siella de ruedes como a carrinos de ñácaros.